【李八方online】議會陣線聖誕P抽獎 黃之鋒慘被DQ
議員助理區諾軒議會陣線朱凱廸陳志全黃之鋒聖誕節毛孟靜范國威
議會陣線今日同助理、傳媒開聖誕Party,一眾議員出錢又出力,助理們都玩得相當高興。陳嘉裕攝
「又到聖誕~又到聖誕」,下星期就係普天同慶嘅聖誕節,議會陣線一眾議員,包括Miss Mo毛孟靜、人民力量陳志全、朱凱廸,同埋今年新加入嘅新同盟范國威、區諾軒今日就同一眾助理同傳媒開Party慶祝。聖誕Party當然唔少得抽獎環節喇,作為區辦議助嘅黃之鋒都有參與抽獎,不過佢同區諾軒因爲約咗地區開會而提早離開,最終因爲不在席而慘被DQ,份禮物就畀咗另一個幸運嘅議助喇。
踏入聖誕佳節,議會陣線一眾議員出錢出力為助理們舉行聖誕Party。開P當然唔少得遊戲時間,作為召集人嘅Miss毛就喺大電視環節似乎唔太在行,講嚟講去都無人估得中,最終2分鐘之內只係被估中3題,係咁多議員之中最少,要被罰拎大利是出嚟抽獎。Miss毛雖然把口唔服輸,但仍然心甘情願拎出銀包入面嘅紅衫魚出嚟抽獎,佢仲笑稱呢份係「最實際」嘅聖誕禮物。
至於答問環節,大部分議員表現都不相伯仲,惟獨一題得朱凱廸答啱,就係要喺地圖誕分辨交椅洲同坪洲,證明朱凱廸土地知識相當豐富。望見議員們玩得咁高興,在場嘅議助亦都拍爛手掌。成個Party嘅高潮當然在於抽獎,連不在港嘅梁耀忠都有贊助禮物。由慢必送出嘅港版的士模型本身由黃之鋒抽中,但因為佢要同區諾軒去港鐵站視察而提早走咗,於是大家就決定將唔在席嘅佢DQ,重新抽過。亦有人發現,朱凱廸放咗自己個名入抽獎箱,笑稱佢咁都同議助爭,要佢另外拎多1,000蚊出嚟抽獎咁話,剛剛開完會趕到場嘅朱凱廸即刻大叫無辜,好在最後都唔使受罰。