祖雲達斯連贏6屆意甲冠軍，堅壁清野防線最為重要，以門將保方為首，加上「BBC」後衞線邦路斯、巴沙利同基亞連尼，多年來為祖記建功立業；不過幾好表現嘅球員，都敵不過歲月，周六主場3:0大勝基爾禾聯賽，係祖記2010年4月以嚟，冇呢4位後防大將參與嘅比賽。

邦路斯季初已經轉投AC米蘭，而巴沙利同基亞連尼加埋都接近80歲，保方又要代表意大利踢世界盃外圍賽，所以祖記教練艾基利，就安排三人休息，正選門將用上施捷斯尼，中堅組合係貝拿迪亞同魯加尼。艾基利賽後仍然話，保方等老將仍然係球隊重要資產，不過都睇到艾基利都準備為後防換班。