情人節當日喺微博上載旅行相嘅周麗淇（Niki），同男友徐正曦享受完美加之旅後，春風滿臉返港投入工作。

Niki今日以「有機大使」身份現身浸會大學，現場突然吹起一陣風，Niki即用手按實裙邊。問到男友有否同行？佢話：「唔講，係秘密。」講到男友份情人節禮物有冇心思？佢話：「OK啦。」

今次美加之旅，佢指係寓工作於娛樂，完成工作後，自己逗留咗一段長時間去玩，完全叉足晒電。

講到事前係咪安排咗好耐，要情人節一齊去旅行慶祝？佢話：「呢啲日子對我嚟講，冇乜特別意義。」

今年歌影視三線發展，工作表將會排到密密麻麻，係咪要盡快完成手頭工作準備結婚？佢話：「唔關事，我事業心仲好重。」

佢仲講笑話家姐周汶錡一直都冇催婚，只係被記者追問先咁講，佢話家姐本身係時尚人，唔會咁老土催婚。