港股噚日繼續下調，但跌破11000水平就有買盤支持，個市都應該準備反彈嘞。市場傳出下周就可以開始發新輪，上限係一周100隻，即每日平均20隻，相信發輪對象會集中喺多隻藍籌股身上，所以唔好過分睇淡滙豐（005）、中移動（941）、長實（001）、和黃（013）、恒生（011）這5大恒指成分股，下周港股可能因此急升。當然，發行商亦可以發認沽輪，衍生出嚟嘅對沖活動可以將個市質到好低，不過除非大戶睇淡港股可以跌破9000點，否則現水平發行嘅認沽輪都幾難有市場。

中建數碼守配股價
中建數碼（1169）舊股配售上板後，股價一度跌至配售價0.40元水平，但有驚無險，始終跌唔穿配售價，而一眾包銷商出力托價。此股長做長有，為咗日後重有生意做，點都要做得好好睇睇嘅。0.40元係短期嘅支持位，可吸納博反彈。
兩隻戶外媒體股已展開上市計劃及向投資者進行推介，現時大市成交轉趨淡靜，短期將抽走部分同類型股份嘅市場游資，所以白馬戶外媒體（100）又再度潛水，跌4.3%，收報5.55元；阿tom（8001）未突破5元就回頭跌穿4元，收報3.825元，挫7.3%；路訊通（888）亦下挫6.3%，跌至1.80元收市。不過資金最後會集結在某隻龍頭股身上炒餐勁，以實力計，白馬雖然比較貴，但勝在有高盛睇場，tom有李嘉誠庇蔭，而恒隆（010）陳氏家族旗下嘅媒體伯樂（8072）上市後，估計會同恒隆一樣唔會有炒味。