上周港股相當好炒，中長線強勢料可持續，如果經濟真正好轉，二三線股將陸續踢高，只要手持股份基本因素冇問題，遲早有得威。投資者要短時間內賺錢，就要靠未來兩三個月嘅經濟Re-rate時期，萬勿錯過。
電訊設備股靜完冇耐，前幾日又旺番，尤其手機股中國無線（2369）同TCL通訊（2618），上周三升超過一成先誇張。據《內線王》范董講，母公司TCL集團自編自導自演爆升故事。喺9月最後一周，TCL通訊首席營運官王激揚對記者曖昧咁話同騰訊（700）有機會合作，高層出完口術，輪到TCL集團出手，買咗總共1116萬股，佔全周成交兩成，咁就將TCL通訊喺一周內炒高四成。
個古仔係就係人為咗啲，不過肯做場大龍鳳，真金白銀炒高股價，舉動唔多尋常，似乎反映主理人睇好公司之後業績同股價，先會玩到咁大。踏入10月TCL通訊股價整固，上周三爆升當然係因為大行唱好中國無線而順便炒埋，但係試完車之後，短期內相信會發力衝上去。
事實上，TCL通訊之前公佈9月份營運數據，相當靚仔，手機同其他產品總銷量大約397萬部，按年增長5%，其中智能終端銷售量76.76萬部，按年增長287%；期內，內地銷量60.55萬部，海外銷量336萬部。總計今年頭9個月，雖然總銷量跌4%，但中國市場銷量增長48%，智能手機銷量更增長540%。由此可見，只要TCL加多兩錢肉緊留喺內地賣智能手機，銷量將會非常唔錯。