本周一停牌嘅聯洲國際（048），越來越令人想起海域同埋泰興。聯洲停牌相信同解釋公司賬目有關，DavidWebb提出咗咁多質疑，再經專欄作者方卓如詳細解讀過後，管理層有必要作出澄清，向股東作出交代。
周三晚聯洲出咗份通告，話董事會成員吳奕敏已於本周二提出辭任非執董，呈辭理由，是公務繁忙，對比之前海域董事紛紛「跳船逃生」，都以私人理由呈辭，算較有新意。據年報介紹，吳氏自04年出任聯洲獨立非執董，以及是Incutech（356）與美建（335）非執董，現於中大工商管理學院任教。用公務繁忙為理由，大條道理可以話中文大學教務繁忙，不過諷刺的是中大現正放暑假。
吳氏同日又辭任Incutech與美建非執董職位，理由分別是工作量太大以及工作繁多，同日辭任3間公司非執董而能夠用3個唔同理由，虧佢諗得到。事件始於廉署上周起訴鈞濠（115）及美建共5名董事，涉嫌就投資重慶一個合營項目串謀詐騙，涉案的黃偉光同時出任上述公司重要職位，吳奕敏除了鈞濠外，正好都是上述公司非執董。睇嚟件事有排搞。

德發延發年報惹疑團

成衣及泳衣生產商德發集團（928）昨勁跌33%，因公司公佈要延至8月6日才發年報。通告話理由係核數師對其聯營公司SinoLegend之財務資料之工作範圍有所保留。睇中文通告頭都大埋，睇英文至知乜事，相信係有關聯營的溢利數字乃根據美國會計準則制訂及有待核實。美國會計準則同國際會計準則IAS頗多差別，有懷疑唔出奇，不過若賬目有問題，好少業績出完到年報至卡住，股價暴跌亦反映聯洲事件陰影相當大。