今季紅軍球迷頭號寵兒，一定要數穆罕默德沙拿喇！呢位埃及前鋒今季英超已經射入28球，之前仲試過大四喜添。「美斯級」嘅表現，當然引起大球會注意，近排就已經傳出西甲班霸皇家馬德里對沙拿好有興趣。不過，有傳利物浦方面已經做好準備，決定將周薪加到全隊最高嘅20萬鎊（約220萬港元）畀沙拿，誓要留住佢！

早前利物浦名宿麥達莫就表示，穆罕默德沙拿係杜格利殊之後利物浦最好嘅收購，「除咗杜格利殊之外，我從來無見過有人第一季嚟到晏菲路就勁到咁！」用到國王嚟比，無他嘅，沙拿今季各項賽事已經射入36球，有機會破埋魯殊一季入47球嘅紀錄。而根據英國傳媒報道，夏季極有可能大換血嘅皇馬，已經將「英超美斯」當成佢哋其中一個收購目標。不過穆罕默德沙拿就唔似舊隊友菲臘比古天奴咁渴求轉戰西甲，仲指自己好鍾意英超，覺得英超踢法好啱自己。雖則係咁，但紅軍會方已經諗住用銀彈手段，加周薪至20萬鎊留住呢位好波之人。

--------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM