上期亞馬遜科技浪未講完，今期要打斷一下，點都讓路畀馬雲。

如果有了解近年嘅馬雲，佢2016年平均每日搭超過兩小時飛機，為嘅係向各國推銷eWTP（Electronic World Trade Platform），另一方面係履行聯合國嘅職務，究竟佢有幾多時間去理阿里？其實冇乜。據聞每個月馬雲同阿里CEO張勇會坐定定一次，吹幾個鐘頭水，為嘅唔係向馬雲滙報，而係馬雲分享下周圍飛嘅發現同埋新想法，而張勇亦交流吓喺阿里打拼時嘅新諗頭。表面上係主僕，但其實似係美斯同C朗坐底交流足球心得。

Apple有Steve Jobs同Tim Cook，阿里嘅馬雲同張勇，或許有啲異曲同工。馬雲係外星人，可以透視、改變未來，張勇區區會計佬出身，加入阿里僅僅11個年頭，亦係世外高人一名，執行能力或許比馬雲更高，「或許」其實講得有點客氣。

簡單咁講，張勇07年出任阿里CFO，然後越權將公司上下避之則吉嘅淘寶商城喺垃圾桶執返嚟，變成今日嘅天貓，其間創造「雙11｣，前幾年阿里霸王硬上弓去搞嘅一系列業務，開始喺張勇麾下，部分已逐漸似模似樣，將蘇州屎變寶藏，而家再將馬雲嘅新想像，逐一放上戰線。馬雲而家仍然係阿里嘅代表人物，論靈魂人物，一早已經係張勇，試問冇佢，阿里近年會變成點嘅死樣？

晉佳
http://www.facebook.com/advanceguy1/

全球樓行 Dream House零距離
https://hk.feature.appledaily.com/overseasproperty