臨近農曆新年,有人同公司分手了,今次係賣羽絨嘅波司登(3998)首席執行官(CEO)梁旭暉。波司登噚日出公告,指梁旭暉因為「家庭緣故」辭任CEO。查實佢喺波司登做咗一年都唔夠,都走得幾快。
波司登二○一三年純利跌逾三成,公司舊年五月就話,因為公司規模越做越大,大股東高德康唔可以兼任董事長同CEO,所以請來梁旭暉,點知一年唔夠,梁生就話拜拜,又由高德康兼埋CEO職務,咁即係還原?
不過,梁旭暉應該不愁出路,佢之前做過嬰兒用品股好孩子(1086)首席營運官,之後去咗鞋股達芙妮(210)做首席戰略官,舊年被波司登挖角,BB車、女裝鞋、羽絨,佢都賣過,所以話應該冇乜嘢可以難到梁旭暉,即管睇吓佢將來賣乜喇。