當年今日
關於我們
【轉會講場】哥帥誘丹尼爾曼城重聚 希古恩做咩獻祝福?
蘋果日報 2017/06/18 10:28
曼城
巴塞隆拿
祖雲達斯
哥迪奧拿
丹尼爾
希古恩
丹尼爾同哥帥想喺曼城重逢,連希古恩都送上祝福?
巴西右閘丹尼爾過去一季先由巴塞隆拿加盟祖雲達斯,表現繼續老而彌堅,協助球隊成為國內「雙冠王」兼殺入歐聯決賽,34歲嘅佢同祖記仲有一年合約,但英國傳媒近日廣泛報道,曼城領隊哥迪奧拿今夏拋售沙格拿同捷西斯拿華斯兩位勝任右閘嘅球員後,有意同呢位巴塞隆拿舊部喺「藍月」續緣,仲話丹尼爾日前表示保羅戴巴拿應該他投尋求更大進步嘅言論觸怒唔少祖記球迷,令佢離隊機會大增。
咁啱另一位隊友希古恩有段離奇片段喺網絡流出,之後仲要匆忙刪post,見佢向丹尼爾講咗一句:「好高興同你並肩作戰,祝福你一切安好,希望我哋好快重聚。」仲唔係goodbye message?不過,有西班牙傳媒就指,呢段片只係丹尼爾上巴西電視台回顧過去球季時嘅其中一個環節,而希古恩嘅重聚只係講緊放完暑假再見,孰真孰假,即管睇吓事態發展如何啦。