外圍雖然冇乜大變，但港股嘅表現就唔多好，反彈咗兩日嘅累積升幅差唔多一鋪清袋，跌成270點。點解會跌咁多？昨日講過，反彈動力已消耗得八八九九，點會唔跌？
恒指幅圖好肉酸，大陰燭低收，補番個上升裂口，下個禮拜一應該仲會有一輪沽壓，乜嘢位先企得穩，18450附近應該可以掉頭回升，之不過10日線好快就會跌穿20日線，整個「死亡交叉」出嚟，反彈嘅空間唔會好大。至於後市方面，睇唔到港股有大跌嘅迹象同條件，聖誕前一兩個禮拜應該可以炒番上去，農曆年前再睇好啲，不過，𠵱家形勢比人強，買貨要等試咗支持位企得住先諗，強勢股當然除外。
美元再顯著下跌，金價反彈，同昨日講嘅金價上升原因（藉口）一樣，即係話炒金唔好睇通脹，要睇美元。可能啲油價反彈咗啲，又會有人搵通脹做藉口炒金，但係睇吓美國啲數據，好難說服自己美國嘅通脹有回升嘅迹象，較為明顯嘅，應該話啲油價已經愈嚟愈接近阻力位。

中移動C輪3496：昨日淡友推低個市，主要係襲擊隻中移動（941），收報63.8元，跌2.4%，走勢好差，本來應該諗吓啲P輪，但係睇個勢下個禮拜一都會低開，再跌多少少，又跌到落條50日線（61.80元），如果守得住，有機會反彈上66元，倒不如等佢試咗位企定買C輪仲抵博。隻C輪3496昨收67仙，槓桿率9.5倍（有效6.6倍），正股升上66元，3496應該喺80仙樓上，等正股試61.80元先睇位買，正股跌穿60.80元止蝕。
俊樺