近年擔任旅遊書代言人嘅糖妹黃山怡，差唔多每個月都周圍飛，啱啱去完台灣拍攝旅遊特輯同拍攝新歌MV，嚟緊又要飛去沖繩再拍嘢，希望趕及喺書展時推出多本旅遊書同埋自己嘅著作。

周圍飛周圍食，搞到糖妹都唔敢偷懶唔做運動，好似早前喺台灣嘅行程，頭幾日又係吃又喝嘅拍攝行程，到最後一日先拍MV，佢話：「喺台灣我都有積極做運動落街跑步，順便睇下遇唔遇到靚仔，好彩到拍MV當日上鏡都唔會肥。平時我做運動要不時換下花式，咁先唔會覺得悶而有恆心去做，之前就跳鄭多燕，近排就做跳步開合動作。」今年都積極灌錄新歌，唔想大家遺忘佢係歌手嘅身份，暫時都錄好五首歌。