今天是「世界末日」，身為球迷，末日臨頭都係睇波至上！小弟選出3大球迷末日前必到的球場；如果聽朝瞓醒世界如常，不妨以完成這3個願望為人生目標。
1. 奧脫福睇曼聯主場：其實這是泛指親身到閣下最愛球隊的主場，睇一場正式比賽。我由簡東拿時代愛上曼聯，今季初有幸親臨奧脫福看了曼聯3:2擊敗富咸一役；坐上看台那刻，與各地紅魔迷一起大叫的場面，真的非常震撼。此行還見證尹佩斯射入加盟首個入球，賽前難得仲有另一偶像、奧運飛人保特做嘉賓！一次過滿足晒十幾個願望，真係末日臨頭都無憾。

2. 阿根廷睇河床對小保加：話晒末日前的願望，梗要貪心啲！這除屬球壇名牌戲碼，仲可滿足埋遊覽南美洲的願望。另一重大原因，是這裏的火爆氣氛和煙花，是香港球迷難有機會感受的。小弟曾於意甲睇羅馬主場聯賽，那種煙火亂墜的狂熱，是任你如何敲鑼打鼓也不能比擬。上月阿根廷聯賽又有煙花傷人意外，刺激得嚟咁危險，啱晒末日先做。
3. 香港大球場：直至今日，小弟印象最深兩場比賽，都是在09年。10月南華亞協盃4強主場迎戰科威特SC，大球場於一場非外隊友賽，而是正式比賽中扯起紅旗，我有幸早3日買了飛有份入場；12月，香港隊在同一球場擊敗日本，贏得東亞運金牌。後者因小弟身處直播室而未能入場，卻是首場講波講到眼濕濕的比賽。如果末日未到，希望還有機會重溫這兩幕激動場面。
方柏翹
now足球評述員