當年今日
關於我們

【妖怪手錶X半澤直樹】堺雅人扮真人版威斯帕嚇細路

蘋果日報 2016/06/26 06:00

菅野美穗堺雅人半澤直樹妖怪手錶運動日本動畫

日本動畫《妖怪手錶》近年喺當地大受歡迎,尤其係細路市場更加賺到豬籠入水,電影版更係一套接一套,繼上年推出嘅第二齣《妖怪手錶》大電影勁收50億日圓(約3.6億港元)後,全新電影已定12月17日公映,今次動畫會用3DCG製作,仲加入真人版元素,主角天野景太會由日劇《阿淺來了》童星南出凌嘉演出,真人版景太嘅造型早前已經曝光。

《妖怪手錶》副產品都多不勝數,為咗宣傳新上架嘅任天堂3DS新Game,竟然搵嚟神劇《半澤直樹》男星堺雅人化身真人版威斯帕,佢塗上紫色嘴唇,再加上閃電頭髮型,造型相當滑稽,不過亦有網民勁彈其扮相頗嚇人。堺雅人同老婆菅野美穗結婚3年,上年一索得男,堺雅人當然要積極賺奶粉錢,而佢今次Cosplay成威斯帕開拓埋細路仔市場,原來仲會同女星菜菜緒一同為呢個Game擔任配音工作。