【臘肉變半鮮肉】關楚耀唔介意另一半微調:最緊要個心
醫學美容關楚耀另一半微調
關楚耀(Kelvin)今日喺九龍灣出席醫學美容集團分店開幕,Kelvin因為做皮膚護理認識咗集團老闆方潔盈,曾經為品牌代言兼令媽媽同妹妹受惠,Kelvin自認貪靚,佢話:「做幕前都要嘅,勤力做機,依家由臘肉變半鮮肉,都會同身邊朋友分享護膚,皮膚靚啲自信心都大啲,我嘅秘訣係外在護理之餘,心理健康、做運動同均衡飲食都要注意。」
問到Kelvin會唔會抗拒整容嘅女仔?佢話:「另一半微調唔係好介意,最緊要個心,不過我崇尚自然,唔需要就盡量唔好,我覺得女仔唔使化咁多妝,我鍾意清純自然啲。」
另外,早前Kelvin去咗馬爾代夫工作,身兼模特兒兼攝影師,幫一個品牌拍攝,佢仲話有騷肌肉,問到係咪收兩份酬勞好和味?佢笑話:「開心嘅,主要吸取吓經驗,錢自己唔太計較,有工作機會要好好把握。」
精選娛聞,喺晒《娛果》
http://fb.com/appledailyent