當年今日

701收料站:大成硬淨得有理

蘋果日報 2004/07/02 00:00


香港噚日持續高溫,小初仍然同幾個經紀朋友去咗大遊行,一路行一路抹汗,最後終於頂唔住,冇行畢全程,但已經成身濕晒兼夾有多少頭暈。
食晚飯時,大家就傾到民企股嘅問題,自從遠東生物制藥(399)出事後,一眾民企股都冇乜好日子過,連帶超大現代(682)發債券一事,都唔知搞唔搞得成。
其中一個老友話,大成生化(809)6月初喺6元樓上開始回落,遠藥事件令隻股跌多兩錢,但估唔到之後反彈力異常強勁,好快已經重返5元以上,前日收市報5.65元,升2.73%,成交股數1053萬股,金額5887萬元。
老友話,大成股價咁硬淨,主因仍然係主力產品賴氨酸價格仍然高企,而公司本身又不受大陸宏觀調控影響,雖然賴氨酸第二季的價格,已較首季回落,但仍然比舊年升好多。
重有,據講大陸有兩間生產賴氨酸的工廠,因為環保問題暫停生產,咁啱印尼又有一間同類工廠,因為技術問題而停產,賴氨酸供應少咗,價格自然企硬,點計都對大成有利。
慕容小初