賴：賴維銘
記：記者吳文輝

記：落咗咁多日雨，終於見陽光，希望今次（5日）谷草賽事唔好再打水戰啦！剛戰（2日）又係潘頓玩晒，雖然今次佢仲係手執多匹實力馬，但部份排檔比較差，熱捧似乎不值。

賴：係呀，無可否認潘頓係一位好騎師，但跑馬講際遇，除非匹馬有好多分在手，否則喺跑馬地被頂出外面跑真係會大打折扣。
好似第五場四班1650米「活力勇士」，之前潘頓連場發揮都無可挑剔，可惜受制外檔，連續三場屈居第二，今次又抽到11檔，加上搏咗咁多場，太熱真係要小心。

記：咁第五場你有冇其他心水？

賴：不妨留意Tony告東尼的冷門「夢幻戰士」。呢匹三歲馬暫時三戰全落第，除咗初出跑快活谷1000米跟唔上步速外，之後兩場其實走勢唔差。
尤其上場初跑1650米，出閘唔算好居於中間位置，步速偏快仍能跟守主馬群，入直路受困群駒之間冇乜機會望空，都係輸三個馬位左右，以一匹初跑此程之馬而言，表現已算唔錯。
今場「夢幻戰士」加羊毛面箍，以Tony哥熟悉馬性程度，相信可以對症下藥，匆匆再出值得留意。

記：「夢幻戰士」交畀谷戰成績甚佳嘅何澤堯策騎，相信可加強信心。而何澤堯第七場三班1200米原本可騎新勝嘅「獎進」，結果就揀咗另一匹騎開嘅「盡開顏」。

賴：其實是否何澤堯揀騎真係不得而知，因為假如騎師book定一匹馬，就算之後有另一匹好馬提供，為了對馬主及練馬師的承諾，通常唔會改變初衷。
至於「獎進」及「盡開顏」都係機會分子，後駒今季越跑越好，加上贏過三班，當然有爭勝能力，睇睇何澤堯臨場如何發揮。

---------------------------
【六四30】守住歷史 拒絕遺忘
https://hk.adai.ly/zdzKtt2RiW