當年今日

  功能議席大改組貫徹「均衡參與」 - 李八方

蘋果日報 2004/04/29 00:00


雙普選變咗「雙失普選」,除非搞一鑊港式「布拉格之春」,導致解放軍揸坦克出銅鑼灣,同市民「血濃於水」打成一片,港人惟有化悲憤為力量,九月良心投票,同埋同時焗董曾嘅○七○八選舉方式,喺中央人民政府劃地為牢之下,爭取最大空間。
首先,就係○八立法會,功能及直選議席各佔一半,首先要董曾增加到幾多席,更加重要嘅就係功能組別一定要重組。

現時分組難反映現實
若然立法會增至一百席,功能同直選各佔五十。功能組別方面,港人一定要嚴格監督,不准特區政府打茅波,將啲議席劃晒畀啲「福建愛國商會」、「維園阿伯愛國論壇」、「長沙灣豬牛屠宰業基本法學習小組」,同埋由鄔維庸做會長嘅「鄔氏(愛國)宗親會」之類,一定要按照聯合國人權標準,全面實現「均衡參與」,將啲功能組別,以職業功能劃分,嚴防特區政府暗中撚嘢,偏幫土共,借住增加功能議席之便,暗中施行「偽愛國極左人工隆胸手術」,搞小動作,專門向左邊一味灌漿、注射矽膠、加墊,搞到左邊好似喜馬拉雅山咁高,壓倒另外嗰邊真正嘅港人民意代表!
現時嘅功能組別,喺九十年代劃分,無法反映今日經濟現實面貌。例如,今時今日又話發展中醫中藥,點解中醫冇獨立嘅一席,醫護界選出嘅年年係西醫?又例如話要搞「環保港」,人哋德國都早已有綠黨執政,點解綠色環保團體又冇一席?至於性工作者,係人類最古老職業,呢幾年飽受北姑賤價衝擊市場,亦應該要有一席。的士司機七年來屢遭欺壓,又話迫減價,又俾村巴谷到冇路行,擺長蛇陣吉車抗議都無數鑊,冬冬淨係識得喊,運輸業嘅議員係自由黨劉健儀,梗係只會射住巴士公司老細,以的士司機為題,都拍過幾套暴力片,冇乜理由的士大佬冇一席?保障新聞自由,傳媒工作者又要有一席,近來明星鍾意講政治,成龍都學人狠批台灣選舉係世界笑話,發展港產喜劇創意,兼協助成龍呢亭人提高論政水準,影藝人又梗要霸番席!七十二行,均衡參與,咁就可以全民提高民主治港質素,為爭取二○一二年普選打定樁!
雞鴨禽販也要佔一席
另外,好似女強人蔣麗芸話頭,以往啲功能組別議員,好多霸住毛坑不拉×,做夠兩屆,好自動引退,想再做咩,有膽就出嚟直選,若然唔敢,即是自己任內冇料到!嗱,例如旅遊業,楊孝華做成十二年,佢又係國泰代表,佢話咁多年佢喺國泰啲手下夥計都高升晒,人哋老江做兩屆都退休,睇嚟楊孝華係時候退選,返國泰做名譽董事,以世伯身份指導吓陳南祿嘞!
蔣麗芸點名劉皇發,話劉主席唔好再霸住新界議席。又係喎。名設計師鄧達智夠係新界人,高大威猛,有香港Armani之稱,點解唔做得新界嘅代表?增加立法會議席,改革功能組別劃界,若然雞鴨禽販有一個議席,又使乜走去政府總部示威怒掟雞籠?
喬曉陽話:港人毋須激動,民主發展,重有好大空間!又係喎!七一大遊行,九月良心投票之外,重要昅實政府功能組別要大改革,全面貫徹「均衡參與」,報答喬曉陽嘅一片好意呀!


傳真︰2623-9278
電郵︰[email protected]