35歲陳法拉自從同Neway大少薛世恆離婚，佢就去咗美國茱莉亞演藝學院讀4年制嘅碩士課程，佢同法國男友Emmanuel拍拖3年，感情穩定，男友Emmanuel曾任法國駐日外交官，目前從商(新聞連結： http://bit.ly/2rzc7FU )，早前同一班外國好友去咗四川旅行(新聞連結： http://bit.ly/2s3J8LA )，生活都幾寫意!

法拉今個暑假冇陪法籍男友，走咗返大陸同香港兩邊吸金，今日有周刊指，當年法拉同薛世恆離婚，拎咗一筆千萬嘅贍養費，不過最近因為喺美國物價高、生活費同學費支出，加上要照顧父母，贍養費都差唔多用晒，所以要趁假期，返嚟香港吸金，出年就重返娛圈，報道又指薛世恆同法拉一齊，用咗76萬美金買咗亞特蘭大市郊嘅一個大宅，不過早前法拉以低於市價賣出大宅。

報道更指法拉交功課嘅短片就搵咗前夫好友王浩信幫手拍，報道更爆法拉同王浩信曾經喺未入行前拍過拖，二人當時喺美國讀書，後嚟因為王浩信屋企生意失敗，王浩信就輟學返咗嚟香港發展，之後做咗歌手，有傳法拉同王浩信再見亦是朋友，王浩信知法拉想唱歌，介紹佢俾Neway大少薛世恆識，睇吓有冇機會簽約，點知法拉冇簽約，仲做埋老闆娘。

有指法拉返嚟，TVB高層余詠珊同杜之克都搵過佢拍劇，開出條件係俾法拉做女一，可以揀同邊個男藝人做對手戲，不過法拉就冇講明返唔返去TVB，只係話有好劇本就拍，原來係有原因，另一報道爆因為法拉開個價6萬一集仲高過楊怡開5萬一集，先令大台卻步。