當年今日
關於我們

中環在線:呂志和捐助理大全因老婆 - 李華華

蘋果日報 2009/11/04 00:00


嘉華國際(173)主席呂志和同理工大學前校長潘宗光非常老友,呂博士先後三次捐錢幫理大,當中包括豪擲3000萬港銀命名「呂志和樓」,估唔到潘宗光退休後,呂博士仍然眷顧理大,近日捐出400萬港銀成立「呂志和伉儷膝關節康復專科中心」。今次促使呂博士再度以銀彈支持理大嘅就係佢尊夫人呂趙錦屏。
太座膝關節痊癒靠理大
原來呂夫人曾被膝關節問題困擾,試過針灸同推拿等方法都冇乜好轉,直到遇到理大醫療及社會科學院院長胡志城教授,建議咗一啲適合膝關節嘅運動畀呂夫人,立即「運動」到病除。
為咗表達謝意,就由老公呂志和捐錢幫助理大發展。
呂夫人噚日仲再三大讚老公熱心公益,樂意捐助他人,正合佢心意。除咗多謝老公,呂夫人仲要感謝神,因為有一次屋企有成員喺美國遇上嚴重意外,幸好神嘅恩賜幫助佢哋。原來呂夫人係咁虔誠嘅教徒嚟嘅。