中國人向上望嘅鬥心，單睇兩岸三地嘅建築物就表露無遺，全球十高大廈，中港台三地佔一半席位。其中新地（016）喺西九嘅環球貿易廣場（ICC），樓高490米，躋身全球第四高。

logo個光環圈住100樓

噚日座落ICC100樓嘅「天際100」試業，之前發展商先招呼傳媒瀏覽。印象最難忘嘅，要數60秒由2樓送你上100樓嘅高速升降機。天際100離地393米，喺2樓搭，粗略計每秒爬升8米左右，話快唔快。全球最高大廈迪拜哈利法塔部，最快每秒爬升17.4米，台北101平均爬升16.8米。唔快唔緊要，識包裝就得，公關講，部雖然唔係全球最快，但肯定令你難忘，皆因天花屏幕有燈光畫面製造效果。

講到包裝，發展商話要支持本地創作，天際100商標都係用本地設計師作品。驟眼睇十足一個光環喺頭，認真大吉利是，但公關話個logo好有意義，光環圈住個位大概就係100樓，環形設計代表360度賞景角度。
審美角度見仁見智，想登上全港最高觀景點，成人網上預售盛惠125蚊，細路長者每位90蚊。做生意最緊要均真，售票處有電視直播100樓外實景，大霧落雨無景睇，可擇日重來。其實想喺金融中心區居高臨下睇維港景，唔一定要使錢，金管局資料中心免費對外開放。唔使錢，位置梗差啲，資料中心位處國金中心55樓。想好似金管局總裁陳德霖咁，企喺IFC之巔俯視維港美景，都係要付出。

李華華
mailto:[email protected]