台灣才女路平（筆名「平路」）係台灣駐香港光華新聞中心主任，文筆了得，最近喺《亞州周刊》寫專欄《美女與野獸》，連續三期講老男人與女性，十分震撼，其中一位俾「平路」震親嘅就係楊振寧，楊教授唔抵得，撰文反駁，又俾「平路」踢多一腳，我哋係旁觀者，睇高手過招，大呼過癮。
夫妻年齡相差五六十年，是否適當，中間嘅愛情成份有幾大，內裏有幾多浪漫情懷，除夫妻兩人之外，其他人只能靠估。據曹仁超從唔知邊度搵番嚟嘅公式，男人第二次結婚，最好搵一位年齡等於自己歲數除二加七嘅女士，譬如五十四歲男人就娶一位三十四歲，啱啱相差二十年，八十二歲男人就娶一位四十八歲。

我哋成班飯腳曾經討論過呢條公式，獵頭Ｌ嘅觀察最有說服力。獵頭Ｎ話：「美國有好多七八十歲富豪娶三十歲性感肉彈嘅例子，老翁不出幾年就頂唔順，歸西去也，遺孀就與年紀比自己大十幾二十歲嘅『仔女』（前妻所生）爭家產，啲美國佬好色，所以鍾意年青性感肉彈。唐人都有如此狀況，不過好多時都係鍾意比自己年輕二至三十年嘅少婦，原因就係年老男人其實需要一位serviceprovider（服務提供者），你知啦，在『平路』筆下，男人到咗七十歲，夜晚頻頻去廁所，一定要有人悉心照顧，有乜好過自己老婆！」
大家駁嘴一輪，卒之認同serviceprovider概念係最深層次嘅解釋，講出嚟唔知會唔會俾女性鬧到狗血淋頭，或者俾老男人斥責為侮辱男女愛情，不過「平路」講老年人啲忌諱講得如此透徹，令男人駁無可駁，左丁山提出呢個現象嚟講吓都得啩？
點解老翁可以娶少婦，老婦唔可以搵壯男做serviceprovider呢？此乃世俗偏見，千年積習難改，唔會喺二十一世紀就出現革命性變動，女性盡可在事業上逐步打低男性（現在已經發生緊），但在男女婚姻上，仍未平等。