以前經常聽到人說，期貨有孖展成份，係洪水猛獸，所以投資者一般都以買賣股票為主。不過，近年越來越多投資者寧願自己炒賣，唔想睇老闆面色，所以筆者亦收到越來越多來信，問士佳即市期指生存之道。
即市期指買賣話難唔難，話易唔易，難在於即時市況之中，既要分析即市的買賣力量，又要留意外圍市況，或者是突發消息對市場的影響，甚至要分析投資者的心理，反應必須夠快。但也有其好處，因為基本因素不會在一息間改變，投資者大可以不理基本因素，純以技術面炒作，例如超買超賣、成交量異動，或以幾隻大股作指標，分析大市走勢，只要投資者能夠保持冷靜中立就可以。

靈活釐訂止賺止蝕位

驟然聽來容易，但人性使然，專業的炒家可能都會被自己情緒左右，做錯買賣決定，在市況順境時，表面上當然得心應手，但當身處逆境，還要去保持冷靜中立，就殊不容易。十個炒家之中，最後可能只有一兩個可以成功，所以輸家往往佔多數，但成功的炒家就贏到好多，當中有不少炒賣伎倆，他日有機會再跟讀者分享。
今日先從買賣紀律方面入手，因為即市指數唔會跟基本因素前進，所以一旦企錯邊，必須要有方法自保，筆者身邊有朋友從事即市期指炒賣多時，倒有些心得可以供讀者參考。
其中之一，是如何釐訂止賺止蝕，有些投資者喜歡用一些固定的數值去做止賺止蝕位，例如止蝕定在100點，止賺則是200點等等。這種方式其實可圈可點，因為大市在不同的市況，波幅可能完全不同，有時大市平均波幅上千點，有時則300-400點，近日指數基數變大，波幅又回升至500點以上，如果以同一數值作止蝕止賺，未免唔夠科學化，讀者不妨試用大市約兩三周的平均真實波幅（ATR）的1/3作為止賺止蝕位，例如行情進行了一定波幅之後，投資者估即市見底，買入造好，如果方向正確，指數就不應比投資者的入市位跌得太多，此時以大市平均波幅的一定比例作為指標，跌多於此數才離場，因為此數值會因應市況改變，較為彈性，亦可以切合不同市況需要，那比只用固定點數做基點，自然更加可取。

張士佳　華富嘉洛證券投資服務部董事