連詩雅（Shiga）、林奕匡同新人黃妍出席小DJ訓練班活動，Shiga話小時候曾諗過做主持人或DJ：「媽咪話我成日駁嘴、包拗頸，細個仲會扮DJ用懶磁性嘅聲講嘢扮愛情專家，朋友打嚟同我講愛情唔開心，會扮DJ同佢解決疑難，然後就會播歌畀佢聽。」後來大個先發現做DJ唔容易，要急才同轉數快，自言冇呢方面能力，所以都係做歌手就算。

係咪拍拖經驗豐富，所以朋友都搵佢傾愛情煩惱？Shiga話：「唔係，細個冇拍過拖都會幫朋友解決疑難，我鍾意分析人嘅性格，so far有7、8成準。」但Shiga話自己永遠都係幫人幫唔到自己：「我有咩唔開心唔鍾意同人分享，如果朋友叫我分開唔一定會聽，我係拎得起放唔低嘅人，可能比較長情。」

而黃妍就首次同師兄林奕匡一齊出活動，佢話：「好緊張，但私下都見過，佢好好，有問題問佢會解釋得好詳盡。」兩人有冇合作機會？Phil話：「佢同小塵埃會幫慈善團體寫歌，遲啲開騷會請佢哋嚟睇。」

精選娛聞，喺晒《娛果》
http://fb.com/appledailyent