前日劉慧卿喺佢fb貼咗張相，入面除咗卿姐同高達，仲有何俊仁、李華明同單仲偕，卿姐係將張相嘅post寫「世紀之戰~李永達入冊前，與民主黨黨友雀敍」，八方見到就問高達呢場「世紀之戰」詳情。高達話原來佢哋想係佢入判刑前聚一聚，於是搞個雀局飯聚，而各人仲帶埋太太出席，於是太太團一枱麻雀、民主黨友自己又開一枱，相當熱鬧。
八方梗要問戰果如何？高達話唔打過真係唔知，原來卿姐係高手，而且細個已識打牌，高達話佢真係唔知阿姐咁勁，平日亦冇見卿姐叫開枱，真係真人不露相！當然卿姐打到尾有錢贏，而佢同李華明就有個外號，佢叫「民主黨魚腩」、肥明叫「民主黨提款機」，咁係輸係贏唔使多講，佢仲打出一鋪雙辣畀卿姐食。不過高達講笑話，其實輸贏冇乜計，因為佢哋打得好細，打足全晚輸贏都只係一百幾十，大家但求開心。
李八方