吳奇隆(四爺)同劉詩詩峇里島婚宴仲有倒數兩日，噚晚佢哋喺大批保安人員護送下現身上海機場準備遠赴峇里島為婚禮作準備，吸引數十傳媒追訪，場面混亂。吳奇隆一隻手拎住個金色袋，向在場傳媒派喜糖，而另一隻手就緊緊拖住老婆詩詩，與兩人合唱嘅婚禮主題曲《手牽手》一樣咁恩愛。吳奇隆全程笑容滿面，而詩詩就戴住口罩默不作聲，至入閘前兩人才回頭揮手講byebye。

今日吳生吳太亦有新一輯婚紗照曝光喇，今次詩詩除咗穿上粉色玫瑰花裙外，仲反串女扮男裝，穿上畢挺西裝，同四爺一樣咁型。兩人喺蒸氣船上情深一吻，「hehe」味濃。

有一對新人又在山頂懸崖邊互相依偎，鏡頭一轉奇隆坐上直升機上擺chok甫士，鬼主意多多，相信到時婚宴上仲有大把靚相俾大家睇。

順帶一提，當日除咗有婚紗相，仲有MV睇，MV叫做《手牽手》(預告： http://bit.ly/1Rq6wY0 　)，吳生吳太主演，吳奇隆又嘟嘴又扮Cute引劉詩詩笑……唉，這些機會，是劉詩詩的。

奇隆同詩詩原定今日11點機抵達峇里，但等到12點仍未見一對新人現身，一名保安透露佢哋已從機場秘道離開，估計係搭完飛機太攰，所以唔想影相。不過佢哋就好貼心，安排咗六、七名黑衫職員、兩名保安、仲準備埋兩部七人車及兩部寶馬Jeep等候到賀嘅賓客。