12港人明天面對中共閉門秘密審訊。民主黨葵青區議會主席單仲偕、區議員劉子杰今早響應民陣呼籲，在青衣城外「連儂橋」擺設街站，呼籲市民在寫有「釋放政治犯」的布上簽名和留言，聲援包括12港人在內的政治犯。不少途徑巿民簽名聲援，有市民想起12港人中有兩名未成年人士不禁落淚，希望早日獲釋回港；亦有市民直指，沒料到香港自從梁振英上任特首後，如此迅速變壞，認為港人目前可在尚有的空間繼續發聲，年輕人則不應「送頭」，「因為所有社會運動都要畀時間，初心唔好變，我哋堅持返我哋嘅信念。」

發起街站的民主黨區議員劉子杰接受《蘋果》訪問時表示，今日設街站是希望喚起港人關注被中共囚禁的政治犯，指不論在深圳被扣押、秘密審訊的12港人，以至目前在港被囚禁的民主派人士，都受到中共不同程度的政治打壓，「香港人一定要繼續關注佢哋嘅狀況，唔可以忘記佢哋，因為佢哋係為香港付出咗好多」。劉認為，面對政府全方位打壓下，港人仍有很多方法繼續發聲，包括充當「旁聽師」關注被捕手足情況，又或者充當「懲罰師」支持本土的黃色經濟圈，亦可以充當「寫信師」寫信關心在囚手足。

參與香港民主運動至今已經30多年的單仲偕形容，香港目前處於前所未有的黑暗，「呢個唔知係咪最黑暗嘅時代，我哋可能面對更加黑暗」，指中共透過《國安法》打壓港人，更嚴苛地對待目前在深圳被扣的12名香港年輕人，「偷越邊境係一個好簡單的罪行，好多國家其實遣返去原地已可以解決，而唔需要有一個秘密審訊。」

單仲偕認為中共連番動作只會令國際更加看清楚中共對香港的壓迫，「香港人唔可以放棄，我哋喺僅存嘅空間，分享一啲訊息、感受也好，都係對過去一年以來運動嘅支持」。他又認為，香港人對政府的不滿情緒，不會因中共打壓而改變，「相反呢啲情緒被壓迫，心裏面不滿嘅情緒會更加大，只不過無宣洩嘅空間，我相信香港人係唔會忘記過去一年多所發生嘅事情，香港嘅下一代都唔會忘記。」

他又指，香港人在90年代初不少人已擔心一國兩制只是謊言，所以香港曾出現移民潮，認為港人經過2014年佔中和去年「反送中」運動後，看清中共的真面目，「30年前嘅恐懼係重新浮現」，「當時嘅恐懼係來自中共遏制內地嘅民主運動，今次係遏制香港嘅民主運動，用嘅方法係一手破壞自己過去廿年，為香港人建立對一國兩制的信心，透過《國安法》去完全摧毀。」

簽名要求釋放政治犯的林太接受《蘋果》訪問時指，大部份港人都希望12港人和多名政治犯早日獲釋回港，談及12港人中包括兩名未成年港人時，不禁落淚說：「而家過咗咁多個月，香港人要做嘅嘢都做唔到，咁惟有、只能夠默默咁祝福佢哋，做到幾多得幾多囉。」她指香港人現時的情況很慘，很多訴求只能放在心中，呼籲：「走得幾多得幾多啦，如果可以嘅話，就盡快離開香港。」

陳先生也指近月見到香港司法制度的崩壞，包括竟可透過一名由林鄭指定的法官，以詐騙罪控告黎智英並一度拒絕黎保釋，「我50幾歲人，係未見過香港可以變得咁差，所以而家可以出聲就要出聲，因為唔知道香港會變壞成點。」

他指，想不到由梁振英2012年上台至今，香港會極速崩壞，坦言感到十分心痛，認為香港人目前只能做好自己，在可以發聲的空間繼續發聲，年輕人亦不應「送頭」，「因為所有社會運動都要畀時間，初心唔好變，我哋堅持返我哋嘅信念。」

另一簽名爭取釋放政治犯、自稱「大中華膠」的陳先生稱，知道香港人面對中共打壓下沒甚麼事可以做，因為權力上難以與政府對抗，「所以我都係表示支持，希望大家仍然可以集氣，有個力量團結埋一齊，希望將來有一日有啲行動可以做到。」他指，中共透過《國安法》對香港作全面打壓下，清楚顯示「一國兩制」只是一個幌子，不會再有香港人相信：「所謂『兩制』只係畀大家有自由搵錢，至於政治所有問題就唔可以掂」。

記者 林俊謙

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！