當年今日
關於我們

文化打哈哈:政府最叻「煩睇字」

蘋果日報 2006/05/04 00:00


嘥人時間嘥人錢係一門好高深嘅學問,而我哋個政府喺呢一方面簡直講得上係專家。
啱啱審計署報告出咗講啲部門點樣嘥錢,跟住原來政府收稅收到滿瀉。之前唐英年引用馬克吐溫話人有兩樣嘢呢世都冇得避,就係死亡同交稅,我想補充一下:冇錯,呢兩樣嘢係避唔開,但係人最多咪死一次,但係交稅要交好多次喎!仲要係交嚟畀政府嘥喎!
咁嘥人時間呢?將啲乜鬼委員會啲名改到水蛇春咁長仲唔係嘥時間?
嗱,問大家一個西九通識題:個西九委員會嘅全名係乜?呢,汪阿姐同大導演最近就係為呢個會而嘈大交嘅呢。個名係「西九龍文娛藝術區核心文化藝術設施諮詢委員會」,一共21個字。呢個都未係紀錄,香港有一間學校個校名有成28個字。呢啲咁嘅名唔係政府嘅「繁體字」而係「煩睇字」,真係睇到都煩。起埋啲咁嘅名,市民大眾又點會有興趣嚟同你討論呀?好,我又嚟幫吓手將「煩睇字」變做「簡睇字」。
西九單嘢貴在不和
西九會?唔好,似狗會;西龍會?好似黑社會喎?西術會?似魔術會,西區會?人哋以為街坊會;西核會?咁又好似生果會;西化會?政治唔正確喎;西詢會?又太似教會,最近中梵多事,都係咪搞;呀,都係用設施個施字,就叫西施會。
「西施會」幾好吖,既有中華文化色彩,而九龍角順嫂又聽得明,仲有就係個個都係靚人。我哋話:「喂,阿姐同大導因為西施會冇位畀粵劇界所以嘈大交喎!」咁係唔係「簡睇」得多呀?
大家想唔想知道西施會嗰英文名呀?算啦,唔煩你哋,寫埋出嚟我呢個二打六揸筆人都可以收筆喇。
其實阿姐同大導又唔使動真火,總之一切……以和為貴。不過有時有啲嘢係貴在不和㗎,點解呢?兩位大姐大大哥大如果唔嘈,西九單嘢咪好靜?所以嘈吓咪大家有話題囉。有話題點都好過冇話題吖。
觀火

傳真︰2623-9278
電郵︰[email protected]