曾經喺頒獎台上向女友講感激宣言嘅周柏豪，雖然一直都守口如瓶，唔提感情事，不過每逢出席公開場合，同女Model合照時，佢都立即進入「僵硬化狀態」，唔敢行得太近以及斜視女模。

今日柏豪去到觀塘，出席新相機發佈會，獲大會送贈最新款相機外，更先後示範自拍功能，當佢同男職員合照時，柏豪非常自然主動靠近，點知之後大會安排女Model同佢合照時，佢就即刻變到石像咁。

柏豪近期主要出外拍戲，同去北京參與央視音樂節目，佢就話：「近排少咗喺香港，最開心係越級挑戰，去到北京參加CCTV舉行嘅《全球中文音樂榜中榜》比賽，可以同EXO-M同場，頭半部自己成績都領先，最後都有第二名。」

問到佢同女友分隔兩地，會否感情生疏？佢未有正面回答：「我同任何朋友都有電話聯絡，我同所有朋友關係都密切，近排的確見任何朋友都少咗。」

嚟緊9月佢就會踏上紅館，舉行首個紅館演唱會，而且佢仲要接多套戲，柏豪就表示只要係喺香港，就會有時間可以操練。

佢仲話除咗跳舞以外，佢會畀好多秘密驚喜大家。問到係咪同辣妹跳辣身舞？佢就話：「上次有，都只係望住佢哋跳，你問我梗係有幻想摸住跳，係男人都會有幻想，只係做唔到。」