杜麗莎同陳潔靈早排喺無綫節目《超級巨聲2》中因批評參賽者表現時意見不合，兩人喺節目中鬧交互片，火藥味十足，慘被嘲霸道嘅杜麗莎之後離開節目返咗去加國，直至噚日先至歸隊，無綫幫佢搞咗個歡迎儀式，仲叫埋其他幾位評判參與㖭！司儀仲壓軸介紹杜麗莎嘅評判身份，品評參賽者嘅時候又讓佢先畀意見。
杜、陳兩人交足戲，親面珠攬攬乜都齊，杜麗莎好熱情咁送上一束紅玫瑰畀陳潔靈預祝佢本月17號生日，仲強調佢哋係多年好友，噚日佢兩個仲冇夾過，齊齊着埋紅色衫，陳潔靈就表現得好開心，點知杜麗莎忽然話：「一陣唔知會發生乜事o架，唔好怪我。」

寸爆田蕊妮

佢兩個又喺耳邊細細聲講，又話邊個做叉同匙羮，陳潔靈接住話：「你係spoon，我係叉好啲，可以叉住你。」之後杜麗莎答嘴：「本來打算唔做，但唔同陳潔靈搞啲話題會悶死佢，所以今次我用匙羮搞吓嘢。」之後佢哋又互送高帽，陳潔靈話：「你係叻女。」杜麗莎話：「你先叻女，你係Birthdaygirl。」陳潔靈話：「我只係早過你生日啫。」
節目開始時杜麗莎又喺度寸嘴辣人，司儀田蕊妮問佢離開咗，但知佢一直有睇參賽者嘅表現，杜麗莎寸爆話：「我唔知你喺邊度收呢個消息話我有睇，其實我冇。」搞到田蕊妮好冇癮話只係照稿讀，杜麗莎先話：「唔怕，有朋友已經話我知參賽者嘅情況係點樣。」