當年今日
關於我們

馮仁昭四圍超:
肥媽有線教煮餸無線搞音樂 發達咯

蘋果日報 2006/05/27 00:00


一向幫有線娛樂台主持《肥媽私房菜》嘅肥媽瑪利亞,最近揸鑊鏟之餘仲擔埋大旗,喺電視台做埋高層,不過,肥媽並唔係喺有線做高層,而係過去幫無綫手,聽落真係好意外。
噚日馮仁昭收到風,話肥媽下個月初會加盟無綫做製作資源部高級經理,馮仁昭打電話向總經理陳志雲求證時,佢承認有咁嘅事:「肥媽過嚟會幫手搞音樂,例如節目配樂同揀主題曲等等,因為呢方面佢好有經驗,所以搵佢過嚟幫手。」
合約冇牴觸
馮仁昭知道肥媽同有線仲有合約,但陳志雲話無綫今次同肥媽係幕後員工合約,同肥媽簽嗰份有線藝員合約係完全冇牴觸。
馮仁昭問番肥媽係咪食兩家茶禮時,佢笑住話:「係呀!我同有線仲有一年藝員合約,但我𠵱家簽無綫係幕後合約,唔會有牴觸,我已經知會咗有線,我覺得今次呢個機會幾難得,自己喺音樂發展都成20幾年,都好想試吓。」
empty
肥媽教人煮餸之外,下個月仲會加盟無綫做高層,明正言順食兩家茶禮。
empty
無綫總經理陳志雲大讚肥媽音樂資歷深厚。
資料圖片