國產SSD將港股殺個措手不及，賣樓要抽稅20%，換樓客肯定大減，癱瘓二手市場，剩番上車客頂住個市，樓價隨時可回落兩三成，內房股暫時都唔使睇。魏力忽發奇想：大陸樓價跌，造成財富大縮水，佢哋會唔會趁高沽港樓撲水？暫時難以評估，但隨着未來幾年供應增加、加息因素、需求持續受壓，中港樓市「一鑊熟」的風險不容忽視。
資金喪炒兩會概念股，上周五推介的金風（2208）逆市爆4%；炒股唔炒市，早排寫過的天津津燃（1265）及巨騰（3336）齊創上高；佳景（703）及興業太陽能（750）仲未收油，不妨留意。

今日繼續發掘破頂股。為改善空氣污染，阿爺將加碼扶持潔淨能源，電動車股應有運行，主攻電動車電池的光宇國際（1043）昨大成交破頂，可優先關注。
光宇是內地最大閥控式密封鉛酸電池生產商，市佔率逾20%，由於是全密封，既省電又環保，是前景最佳的電池種類，目前佔總營業額55%；鋰離子電池則佔31%，是建立太陽能及風力發電廠的必需品，發展潛力亦高，更有機會獲併購。
公司去年中期多賺47%至2,293萬元（人民幣．下同），12月出售附屬權益，賬面料賺1.88億元，如能及時入賬，更有機會發盈喜；現價PB僅0.6倍，防守性甚高。

魏力
http://www.facebook.com/2012jason