港股去年慢升急跌，今年轉玩慢跌急升。慢跌的折磨之處在於，早排才死心斬貨，轉頭就「回馬槍」挾上。升第一日唔信、第二日半信半疑，到第三日衝入場，剛好又接火棒。無論你追番之前斬的「好股」，抑或轉買第二批「心水」，結果一樣，買完過幾日又坐艇。唔信邪死守多陣，虧損就開始入肉，到捱唔住又斬一轉，過兩日又彈番上「投降價」之上。
慢跌的原因，主要是美元強勢，促使資金從新興市場外流。MSCI國際新興市場貨幣指數在今年1月26日及4月4日造出1728點「雙頂」後，4月25日失守1704點橫行區底部，跌勢開始轉急，上日收報1685點，回試2014年8月的頂部水平。如再失守，可確認2016年以來的升浪告終，進入下行周期。

該指數與港股的關係密切，記得2016年2月，恒指創出18278點低位後，展開新一輪升浪，而貨幣指數則在1月份見底。今年1月26日，指數升至1728點高位，而恒指則在1月29日33484點見頂，時間只差1個交易日。即使貨幣指數於4月回試早前高位，但恒指早已無力再上，如今貨幣指數亦反覆尋底，港股前景難言樂觀。阿根廷加息至40厘，對抗匯率大貶值，其他多國貨幣亦陸續插水，新興市場危機值得關注。

魏力
http://fb.com/2012jason
本欄逢周一、五刊出