記：《蘋果》記者
毛：立法會直選議員毛孟靜

記：王維基由09年12月申請免費電視牌照，至今近4年，重金挖角、拍劇，是三個申請者中最落力，王維基說過：「冇諗過會冇牌」，結果政府真的不發牌給他。對今次政府的決定，是否超乎所想？
毛：我係震驚，本來以為政府係拖字訣，以為佢開記者會話等到15年11月無綫、亞視個牌到期先公佈係咪發牌。結果政府係批，但竟然寧寧舍舍唔批一個萬眾期待嘅招牌，乜嘢意思呢？當時我感覺係speechless，無言以對，政府玩到咁樣！
記：你滿意政府這些理由嗎？
毛：我實在睇唔到係咩理由。舊年11月，立法會要求政府盡快發出電視牌照，政府當時回應，發牌有8個準則，財政穩健、節目質素等，發牌當日，政府突然公佈40頁文件，審批準則變咗11個，真係火都嚟埋，你隨意搬龍門，鍾意加多啲準則，唔鍾意減少啲。
新準則失驚無神整個「公眾利益」，公眾利益呢四個字由呢個政府嚟講，簡直令人作嘔！今次政府嘅做法正正就係違反公眾利益。政府有冇睇到民意？facebook嘅撐王維基嘅page，六個鐘頭，25萬人like，係a quarter of a million（一百萬之四分一），有幾何會有25萬人，一齊去like一個page，第二日已經係36萬，因為政府嘅做法真係太唔公道。
政府主動搵佢申請，卻𠱁人入局，王維基一共為咗呢件事使咗9億，係好唔公道。如果你唔畀now、唔畀cable，兩間公司都唔會炒人，但你唔畀王維基，佢就一定要炒人，然後政府話，佢炒人搞到你唔開心，真係貓哭老鼠，真係可恥。
記：那麼你認為王維基輸在甚麼？
毛：佢係輸在政治打壓上，係北京打壓佢，梁振英係個聰明人，佢知道唔發牌畀王維基，民間反應一定係咁大，但因為係北京落柯打。點解北京咁仇視王維基？因為王維基言論出位、性格我行我素。但王維基講過話自己冇政治立場，佢做過政協，佢只係想搞娛樂電視文化。
中共要控制意識形態，因為免費電視係入屋，全港九新界嘅屋企都睇到。
無綫劇中嘅「人生有幾多個十年」，丁丁名句，影響一代人嘅心態，我呢代人，仲係諗住《網中人》、《天蠶變》嘅劇集，中共真係驚電視會影響人民，所以一要掌握軍權，一要掌握意識形態。
記：你對吳光正的奇妙電視、李澤楷的香港電視娛樂有沒有期望？今次發牌的決定，對已收看有線和now的觀眾來說，有甚麼得益？無綫日後是否會繼續獨大？
毛：無綫一定會繼續獨大，因王維基嘅劇集真係拍得好，雷霆萬鈞，唔係求其搭個佈景，中央係驚佢勁過無綫，取代無綫，擔心王維基變得超然，無論性格上、聲譽上，王維基做人處事上如甩繩馬騮，難以控制同駕馭。
有線都會投資去爭奧運主播權，王維基都會瞓身拍劇，但now究竟做過啲乜嘢？對於已經有收費電視嘅人嚟講，可能只係日後唔使交月費而已。今次，香港人係失去咗一個睇有質素電視台嘅機會。
李澤楷同吳光正財政係穩健，但同節目質素唔掛鈎。新獲發牌嘅兩間電視台嘅質素，最終要睇最長遠，但佢哋兩間公司會唔會又投資收費電視，又投資免費電視，做雙重投資呢？記住，免費電視唔係賺梗。
記：中央連免費電視也要抓緊，未來的民主、普選是否前途更黯淡？
毛：從呢件事係見到，如果乜嘢都唔做，香港嘅民主前景唔單止係灰濛濛，而且係黑暗一片，中央係扭盡六壬，挖空心思嚟將香港大陸化，控制傳媒，控制意識形態。

mailto:[email protected]

■無綫劇集被指十年如一，常有「煮個麵畀你食」的情節。互聯網

■宣萱演的角色經常被綁架，網民揶揄：「有宣萱嘅地方就會有綁架發生。」

■May姐（中）主持的飲食節目獲雞汁贊助，故常以雞汁調味，好hardsell。

■《天蠶變》是亞視經典劇集，現卻遭填塞播放時段。

足本收睇《亂噏24》x 陳慧琳；之後有請搞笑孖寶鄭中基谷德昭玩轉再玩轉！
周一至周五《亂噏24》約定你： http://bit.ly/appletalk24