前港姐代蓮曦丹美，投入時裝界，稍後為跨年活動《環球兒童模特兒大賽》擔任愛心大使，今日喺尖沙嘴與傳媒見面，透露決賽將於明年初在香港舉行，會喺世界各地招募。

代蓮曦丹美稍後分別會到紐約、米蘭及巴黎出席時裝週，與知名品牌合作當模特兒，順道宣傳此活動。雖然向着夢想天橋發展，但代蓮曦丹美對演戲都好大興趣，有份參演嘅劇集《是咁的，法官閣下》即將播出，佢十分期待，劇中與黃智賢有床戲，佢話：「拍時好緊張，場戲都幾親密，有錫有攬，只係着一件裇衫，監製同我講當對方係最愛嘅男人就得，所以我將黃智賢幻想做最喜歡男明星、前男友同夢中情人集合一齊，導演都讚我自然。」

之前佢幚亞視宣傳亞姐，會否擔心大台小器，分分鐘會被cut戲？代蓮曦丹美話：「唔驚，唔係自己可決定。」又主動澄清現時自由身，同亞視並無簽約，上次現身亞姐宣傳只係去搵朋友，點知朋友臨時叫佢撐場。

精選娛聞，喺晒《娛果》
http://fb.com/appledailyent