胡杏兒、宣萱、薛凱琪、陳敏之及張敬軒等噚晚喺尖沙嘴一酒店出席時裝表演。

作為品牌老闆娘嘅杏兒，請來一班「胡說八道會」嘅好姊妹黃智雯、胡定欣、李施嬅同胡蓓蔚當然有去撐場。挺着大肚嘅杏兒以一身黑色拖地長裙亮相，佢話老公對佢咁粗勞嘅工作就有微言，但係佢就話有喜事要宣佈：「10月上海會開分店試業，不過撞着我預產期10月尾，所以到明年修身靚返至搞開幕。」

杏兒話產前嘅工作都較輕鬆，目前還有一個廣告未拍。佢話o依家胃口很好，肥咗20磅，剛好合適生BB。問到係B仔定B女，杏兒就話暫時未知BB性別，因為要等喺外地嘅長輩返香港先問醫生。目前未有買BB東西，亦未想設計BB衫，想先設計大肚婆衫先。

另外，姚子羚喺劇集《同盟》中有一幕着裙起腳鏡頭，被網友改成走光，又將眼改成豆豉眼變成「表哥」，佢笑言:「成為一種symbol都好，冇所謂。」品牌設計師姚子裕本身有幫軒仔設計，佢話自己試過室內設計，胡定欣就話好多朋友結婚都想搵呢個品牌做衫，已經成日幫自己做視后衫，軒仔就話係撐大會設計師，因為對方為自己設計過多次演唱會衣服，今次喺嚟報恩。