燈燈燈凳，3.26特首選舉投票日未到，香港已經有個新特首……雖然只係半日咁多，而且只屬署任，但已經令唔少市民譁然，皆因署任人係財政司司長陳茂波。由本來無緣加入梁班子到突然任財爺兼特區話事人，囤地同劏房風波無礙佢扶搖（定符碌？）升呢，唔少網民就形容佢係「水鬼升城隍」，話特區政府根本有人才荒！
波叔有得喺任期臨尾埋齋「光宗耀祖」，過一過特首癮，多得特首梁振英同政務司司長張建宗，因為梁振英聽日先到深圳拜訪廣東省委常委、深圳市委書記、市長許勤，兼參觀港大深圳醫院，其後到廣州拜訪廣東省委書記胡春華；政制及內地事務局局長譚志源同特首辦主任邱騰華都會隨行，晚上返港。

梁振英張建宗同日離港

本來梁振英離港，應由張建宗署任特首，但張建宗同日下午亦率領特區政府代表團去廣州，同廣東省副省長何忠友共同主持粵港合作聯席會議第22次工作會議，之後會陪梁振英參與廣州訪問行程，同樣夜晚先返，造就波叔同日下午署理特首職務。
查實得嗰半日特首時光，都冇乜咁特別風光，但睇番波叔嘅仕途，又難免會令人感受特別多。梁振英原本預咗波叔做新增嘅副財政司司長㗎嘛，點知重組政府架構建議夭折，令波叔無緣入閣，邊個又估到麥齊光會因租津風波，上任後極速下台，令波叔有機會頂上接任發展局局長？
之後發生囤地同劏房風波，無礙呢位梁粉嘅從政路，曾俊華上月獲批辭任後，被梁振英欽點接捧，估唔到今日發表任內首份亦係最後一份預算案翌日，竟然做埋特首？呢個2月對波叔嚟講，認真難忘！

李八方