非建制陣營嘅候任議員會喺9.28即係傘運兩周年當日，喺立法會大樓首度碰頭，如無意外新一屆立法會委員會嘅正、副主席「搶位戰」，都係呢個會議嘅議程之一。而喺呢個會議之前，八方聽聞傳統泛民陣營，即係民主黨、公民黨以及新組成嘅聯盟「專業議政」，都已經同建制中人非正式開會摸底，傾下他日點樣協調分餅仔。

由於建制派喺議會人數多啲，若然個個委員會都冧友加入，非建制都好難獲選為主席。八方聽聞，建制派都唔想搶到盡，願意開放三四個委員會畀非建制揸莊，包括衞生、福利同環保panel等。前兩個panel休會前嘅主席都係泛民，前者係李國麟、後者係張國柱；環保則由民建聯陳克勤揸旗。據知呢幾個委員會都係民生主導，政治味唔算濃，令建制派覺得未嘗不可開錄燈，但覺得唔適宜由新丁一步坐正。

據知有份同非建制陣營商討嘅建制派，包括民建聯陳克勤。佢承認同主席李慧琼見過部份泛民，大家都想議會有個好嘅開局，所以協調下正、副主席人選都係好事。佢話等各自向所屬陣營匯報後，遲啲會再埋枱進行實質討論，換言之真正戲肉仲未到。