樂隊野佬(Yellow)繼去年辦過一場向80年代流行曲致敬嘅演唱會後，噚晚喺九展再舉行一個向90年代致敬嘅《Red Hot Hit 演唱會》，當中大玩90年代嘅流行曲，包括四大天王、鄭秀文及許志安等歌手嘅金曲，又邀請到吳國敬、蔡立兒同車婉婉擔任嘉賓。

演唱會以全企位形式，全場氣氛好好，台下觀眾全程跟住唱，演唱會尾段仲有一段長達18分鐘嘅舊歌Medley。 五位成員完騷後接受訪問，成員何兆基表示：「今日個Show好感恩，好難得請到九十年代歌星做嘉賓，我哋其實係唔識佢哋嘅，但一邀請佢哋就答應，仲個個都好玩得好專業。」先後辦過80年代同90年代嘅流行曲演唱會，會唔會下一次就玩千禧年後嘅流行曲？何兆基話：「唔會啦，呢類演唱會嘅方式暫時告一段落。」

成員們表示其實準備呢種演唱會比起自己嘅音樂會仲辛苦：「因為好多過我哋都唔識要由頭夾過，為咗嗰段18分鐘嘅Medley我哋係Band房夾咗好耐，仲成日彈錯鬧交，而且揀歌過程入面都好辛苦，好多歌都好想唱，所以下次又要再諗有啲咩方式去玩。」 主音小胡就提議或者可能下次玩吓電影歌曲，不過都係要好好計劃吓先。

精選娛聞，喺晒《娛果》
http://fb.com/appledailyent