韓國天團BIGBANG嘅隊長G-DRAGON（GD）上月先嚟咗香港為其世巡演出，噚日佢就唱到馬來西亞吉隆坡，仲邀得曾傳緋聞嘅Sandara再任演唱會嘉賓。

今次演唱會喺默迪卡體育場舉行，雖然天公唔做美，現場下起大雨來，但無損現場15,000名粉絲嘅熱情，佢哋冒雨繼續撐GD，令GD大為感動。而原本下午綵排環節時，因大雨關係而有所延遲，GD綵排時就戴住粉色冷帽、黑色口罩及小手袋喺舞台繼續荀，佢又以英文講：「其實呢啲歌今日唔會唱。」

到晚上演唱會開始，GD就先以《Heartbreaker》揭開序幕，點知原本已經停止嘅雨勢再度增強，但粉絲就唔怕大雨，着住雨褸繼續揮動螢光棒，當嘉賓Sandara出場時，全場掀起高潮，GD亦唔避忌，撒嬌將個頭挨近Sandara手臂，又感謝Sandara做嘉賓。眼見雨勢越來越大，GD就體貼問粉絲「還好嗎？」

同時GD自言今次馬拉巡唱係世巡倒數第10場，表示過埋馬拉呢一場就只剩下九場世巡騷，之後又大賣關子透露BIGBANG會有新計劃，但就冇講係乜。

另外，根據全球性音樂資料分析網站公開嘅資料顯示，GD、太陽同iKON成員Bobby成為韓國iTunes最多第一位嘅韓國Solo歌手，當中GD憑《權志龍》專輯包攬46個國家及地區嘅iTunes第一位，而太陽新專輯得有26個國家及地區成為第一位，Bobby嘅專輯就成為22個國家及地區嘅第一位。