嶺南大學噚日宣布明年約滿嘅校長陳坤耀續約多兩年，至○七年八月底約滿。咁就真係奇，嶺大噚日出嘅新聞稿都話校長任期一般為五年，但陳校長卻只希望簽兩年，校董會惟有尊重佢嘅決定。嶺大同陳校長都冇交代點解只簽兩年。
政圈中人話，陳坤耀係要為加入政府做問責局長做準備，因為○七年會換特首（如果阿董冇提早俾北京趕落台嘅話），而嶺大校董會主席梁振英又係傳聞嘅特首人馬，如果振英哥坐正，好大機會拖陳坤耀入政府，簽五年嘅話到時會好麻煩。
呢個推斷係真定假，只有陳坤耀自己知。不過前兩年阿董推行問責制時，都盛傳佢會加入政府；到呢幾個月又傳李國章會過檔代楊永強做衞福局局長，李國章原來嘅教統局局長個位就由陳坤耀坐。政府啱啱公布由周一嶽代楊永強，陳坤耀就拍板續任兩年，啲時間巧合成咁，特首人選大混戰，可想而知有幾混亂。



傳真︰2623-9278
電郵︰[email protected]