即將帶團去上海訪問嘅立法會主席曾鈺成，最近成為一篇英文「報道」主角，話佢近日成功破解一個困擾數學家272年、人稱哥德巴赫猜想(GoldbachConjecture)嘅數學之謎。「報道」引述阿曾指，咁難嘅數學題都搞掂，要搞掂政改「又有幾難？」更好抵死咁「引述」長毛都大讚阿曾好聰明。

由於阿曾係港大數學系高材生，平時鍾意鑽研數學難題，曾經更係「數獨」狂熱粉絲，所以呢個「報道」出街後旋即喺網上瘋傳，大讚香港多咗數學奇才，當然有人亦質疑係「假新聞」。八方特別就此問曾主席，佢聽完即刻笑爆嘴話篇「報道」中，其實有條link，大家睇睇就知咩事。果然，一開條link就有答案：「HappyAprilFools’Day!（愚人節快樂）」