曾俊華明明喺電視度叫人「俾意見唔使黐鬚」，點知原來佢純粹係叫你留意見，冇話會睇，更加冇話會參考，大家如果真係有留意見畀曾司長，今次可能諗多咗。
敏妮上個禮拜講到，將6000蚊入落打工仔戶口，未即時益到各位打工仔，但就即刻惠及積金受託人，仲話滙豐應該最受惠，事關佢係全港積金市場佔有率最高嘅。加埋曾司長仲想出埋抗通脹債券，十之八九滙豐都應該有份參與，所以敏妮貼滙控（005）係受惠股。

話口未完，滙豐就宣佈，免收6000蚊嘅首年年費。有報章估計，每個戶口可節省45至166蚊，仲話會引發其他積金受託人相繼跟隨。起初以為滙豐不愧為「香港人嘅銀行」，但心水清睇真啲，你會越睇越多問號。首先滙豐只係減收年費，你以為係首年所有費用，但睇睇積金局網頁，基金主要收費通常分五大類，包括參加費及年費、交易費、基金營運費、基礎基金收費及其他服務收費。
如果根據滙豐新聞稿嘅字眼，只係減年費，其他嘅交易費、服務費、營運費都應該冇得減。
所以滙豐話首年免年費，究竟每個戶口係咪節省45至166蚊「咁多」，係一個問號，因為年費只係佔其中嘅一部份。
咁年費其實又佔幾多？本來喺積金局網頁係有分列出嚟，但大部份受託人喺顯示年費嗰欄，都係填「０」或者「不適用」，因為已經計入一籃子收費度，一般人睇唔到。
更加要留意嘅係，強積金收得最大嗰嚿其實係基金管理費，呢樣當然唔會減免。
積金局唔止一次要求受託人收費要透明，但今次曾司長注資6000蚊入大家個戶口，唔單止未獲掌聲，仲反映積金受託人收費係幾咁任佢噏。

溫敏妮
http://wanmanli.com/blogs/