劉香萍身兼監製、導演、編劇及出品人的電影《一棵心中的許願樹》，由其女兒貝安琪主演，本月13日劉香萍舉行電影聚會時，稱聲該片去年報名參加角逐奧斯卡，又指電影去年上映時，每場都差不多爆場，甚至透露將開拍續集，邀請周潤發及郭富城參演。當晚活動上，更有大字報寫上「好友與劉香萍導演慶祝角逐奧斯卡金像獎回歸香港後第一次電影聚會」。

不過，續集未開拍，已上映了一場六國大封相，事緣劉香萍與龍華酒店合作，於前日（27日）在沙田龍華酒店舉行「看電影、吃好菜」活動，但事隔兩日卻爆出追數風波，龍華酒店今日在facebook官網向劉香萍發公開信，聲稱借錢給劉香萍，力數劉香萍帶人到龍華食飯收回扣，又指向劉香萍購買的換票證全是騙局。

龍華官網寫道：「前幾天借款一萬元，你完全失憶！你帶客人到龍華吃飯收回扣比餐廳還多，$300元餐價，你要回扣$200每個人頭，至今龍華共支付你二萬九千二百元，你再有甚麼要求，請與我的律師及會計師聯絡。龍華酒店支付五萬元購買換票證，原來是騙局，只是騙我們購買一套不知道是否會上畫的電影廣告印刷品，這五萬元現金，與你當時的承諾完全不同，希望你這二天退回龍華酒店有限公司。你真的太過份了」龍華又在FB上載兩張支付劉香萍的支票和一張入數紙，支票銀碼分別是10,000元和19,200元。

《蘋果》致電龍華酒店負責人鍾太了解，她指去年才認識劉香萍，當時劉香萍聲稱自己的電影《許願樹》用5千萬製作，一張戲飛原價要100元，但開價50元一張換票證賣予鍾太，鍾太表示本住「支持香港電影」心態，私人出資5萬買了1,000張換票證。鍾太說當時有追問電影上映日期，劉的答覆是：「就快，一、兩個月可以上。」鍾太其後收到劉香萍通知「印多了1,000張」，希望鍾太買入所有換票證，但鍾太拒絕並向劉說：「如果你上咗，電影有好評，我哋再考慮。」

鍾太又透露，劉香萍之後游說用她的製作公司，在歐洲拍廣告為龍華酒店宣傳，開價5萬瑞士法郎，鍾太指劉香萍建議拍分別在冬、夏天兩次拍攝，但第一次合作後非常不滿，因為劉香萍遲大到：「第一次佢要拍宴會廳，我哋請嘅百幾位臨時演員準時到晒，佢哋（劉香萍）都未出現，由朝早10點等到凌晨4、5點佢哋先出現。」鍾太指當時支付了3萬瑞士法郎做首期，其餘2萬包括第二次拍攝及剪片等後製工作，但劉香萍不停追數，鍾太抱怨：「第二part又未拍，我點找埋尾數俾你？」

返港後，劉香萍向鍾太說被人追債，鍾太大呻：「因為佢欠人100萬人民幣，又話全中國放映，又話去得奧斯卡，但全中國一次都冇演過！總之冇發行到，對方拎咗100萬嚟做廣告，一係叫要佢拎返100萬出嚟，一係告佢清盤。」劉香萍提出借錢1萬救急，鍾太表示曾以「龍華有限公司」支票過數借出1萬，但其後亦分別借過2萬和8千元給對方，最終，鍾太向劉香萍建議：「你請啲朋友嚟我到食飯，你收300蚊一個人，你自己俾100蚊都得，如果你請到一百個人嚟，你都可以叫賺到2萬蚊。」促成當日充滿爭議的飯局。鍾太稱：「放映費我唔識，我淨係做酒樓，只係提供地方、飲食。」

而當晚飯局菜單，又成為另一個爭拗點。劉香萍投訴菜式、時間不對辦，但鍾太堅持是跟菜單上菜，又透露當晚菜單，劉香萍有份設計：「啲菜式係佢同我哋廚師設計，因為佢只係畀咗我哋100蚊，但總共要有10樣菜，100蚊係要食乜嘢？我哋一隻乳鴿都要98蚊，係佢自己講，一人4分1就得，我可以拎張單畀大家睇，可以計到要幾錢。我都係憑良心收成本價，仲要幫工等成本，如果計埋呢啲，仲使做？」她解釋當晚飯局，劉香萍收取客人每位300蚊，但實際價值只得100蚊，又舉例：「好似啲大陸團帶你去買首飾，只係價值100蚊，但收佣400蚊，佢咪賺緊呢啲囉。」

鍾太稱當晚以信用卡找數：「埋單價錢是28,800蚊，佢畀返我9,200蚊，其他都係佢賺。個張credit card收兩萬幾，仲要叫我今朝回返水，畀返19,200蚊佢，我今朝入數俾返佢。但我嗰日畀返10,000蚊佢，佢又一個字都唔提，佢話我飲醉、發夢。」鍾太計數，前前後後總共給了107,200元給劉香萍。鍾太投訴劉香萍不斷WhatsApp、微信、電話訊息騷擾：「佢一早由6點開始，可以一路send咗17個訊息畀我，到現時為止係百幾二百條，搞到我都癲咗。」鍾太指劉香萍不斷在朋友圈詆毀自己，又展示朋友鬧自己的訊息相逼，鍾太強調會找律師及考慮報警。

鍾太與劉香萍紛爭，更扯出米雪都是受害人：「佢請米雪去紐約，但你應承咗人嘅機票錢，都要畀人呀，人家為咗你特登飛去美國！係佢劉香萍將米雪個訊息send俾我睇。」對於劉香萍聲稱電影去年9月24日已在香港上映，鍾太說：「部戲只係包場，唔係上映，我個朋友都係做飲食業，就係佢畀咗2萬幾蚊包場。」

鍾太之後在龍華再接受《蘋果》訪問，指知道劉香萍經濟出現問題，一心希望幫助對方渡過難關，建議安排朋友到龍華食飯，她說：「每個人收300蚊，有200蚊畀佢袋，我哋只收番100蚊食材費，最終96個人嚟食，佢朋友幫佢埋單碌咗28,000幾蚊，佢第二朝一早就即刻追我回返19,200蚊畀佢，因為客戶係信用卡付款，我哋唔係即刻收到錢，佢係咁追我，我只好去銀行過數畀佢。」

至於鍾太以5萬元購買1,000張換票證，鍾太說：「佢話齣戲會喺全港全中國上映，但齣電影兩年嚟遲遲未能上映，劉香萍話齣戲會上奧斯卡，喺香港會舉行首映禮，邀請周潤發同最頂級嘅演員朋友出席，朋友們都渴望同發哥影相，最終冇首映，只喺座位有限嘅戲院包場播放，朋友睇完都好嬲，一個明星都冇，連佢個女（貝安琪）都冇嚟。」據知，該包場播放電影版本，連聲效也未完成。鍾太指劉香萍隨後表示印多了1,000張換票證，鍾太婉拒再購買，而劉香萍表示該1,000張換票證暫存在鍾太處，鍾太表示，之後亦將戲票歸還給劉香萍。

鍾太無奈回應：「我哋咁幫佢，佢反過來話我哋爭佢錢，佢每次返嚟香港喺我哋酒店呢度住，食嘢、飲酒 ，一蚊都冇收過佢，最近佢喺德國返嚟話要住呢度，我哋因為要顧及其他人客，而且佢要家居隔離14日，所以婉拒咗佢。」

-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新