當年今日
關於我們

【睇通睇透】預測一匹升班馬可連捷 (魯賓遜)

蘋果日報 2017/07/04 20:38

魯賓遜劍飛聲睇通睇透

俗話所云:「睇住銀包做人」,這正好形容中小型馬房的處境,廄內馬匹的質量較遜色,兵源捉襟見肘,在馬匹部署方面,亦要多花點腦筋。鄭俊偉馬房只差一Win贏夠16場畢業,今期正選馬多達九駒,其中「劍飛聲」可繼續反彈。
李易達在5月21日憑「勝利導航」取得今季第16場頭馬達標後,至今出馬54次,只得一亞三季,而跑第十名或以外,卻多達12次,明顯地馬房為下季成績而鋪路,本季煞科前不斷安排馬匹出賽求減分。另一邊廂,鄭俊偉剛憑「歐洲巨星」贏得今季第15場頭馬,務求在煞科前多添一場勝仗。
今期賽事鄭俊偉三班泥地1200米正選馬「劍飛聲」,上半季狀態及進度不理想,連場大敗減分速度相當快。季尾操練回復正常,而且重燃馬匹的競賽意慾,表現亦隨即轉好。此駒上仗在四班跑同程,彈甩對手贏一個馬位,姿態有餘未盡,勝後只加六分,而現時評分仲比季初低21分,即使今仗升上三班,依然有權爭勝。
「劍飛聲」上周六晨課拍跳,助手收短韁繩扣到實,谷起馬匹心火,前腳踢出力度強,腳頭相當硬朗,狀態仲靚過上仗,今次對手季內都未贏過三班同程,水準並不算高,而此駒只孭119磅,爭勝條件雄厚,如排位理想,可以穩位望贏。