相信會出戰九西補選嘅前大台記者、前政助陳凱欣，獲建制社團力撐做「健康大使」谷人氣，可是效果不似預期，有傳會辭任兼改變宣傳策略，最新搞作係發動C9攻勢，在fb推出「阿欣廚房」短片，去九龍城街市買餸，落區集氣。

陳凱欣自言細細過就跟媽咪去街市買餸，更一直以媽咪為榜樣，希望每餐都為家人準備，所以工作幾忙，都會抽時間到最熟悉嘅九龍城街市買餸，可能為咗顯示自己唔係「空降」九西，佢話認識唔少檔主，仲係老友，經常傳授煮餸秘訣俾佢。

陳凱欣今次買咗「三餸一湯」材料，包括豬骨、海底椰湯包、三文魚等，不過短片只有買餸，下集先示範廚藝，咁又係，補選提名期未開始，佢唔使咁快入「熱廚房」囉！