【Hotcha十周年計劃開騷】自爆有人追 黎美言豪言:多到唔識揀
Hotcha黎美言李家鼎
黎美言(Winkie)、李家鼎噚晚喺尖沙嘴出席「We Can Cook謝師晚宴」,原來Winkie嘅爸爸係廚師,所以佢都識得煮兩味,Winkie話:「女人識煮嘢食係加分位,希望將來嘅男朋友都識煮,家人識煮嘢食係family man,不過我o依家仲未搵到呢種男人。」
不過講講下,Winkie就自爆最近桃花唔錯,好多人追,仲話唔知點揀好。咁多仔揀,唔知佢要咩條件呢?Winkie即講:「照顧我、做一個好好嘅聆聽者、要有耐性、愛錫家庭。我要求好低。唔使有錢,我有收入,唔好咁高要求,真愛難求。」
至於Hotcha之前提過想喺今年舉行入行10周年紀念演唱會,Winkie話:「其實我哋3個已經出過嚟開會,係想搞,搵緊投資者,我哋3個根本冇不和,有互相keep住聯絡。」問佢今年已經過咗一半?仲趕得切嗎?Winkie即答:「唔係,只要喺明年4月4日前,都係10周年。」
另外,鼎爺最近要幫大台拍飲食節目,所以佢已經提早同家人食飯慶祝父親節:「出去食,自己煮太辛苦,孫仔一歲可以食魚,o依家見到孫仔都好冧。」收到乜禮物?鼎爺話:「未知,父親節仲有幾日先到,其實最緊要家人平安、身體健康,個孫快高長大、聰明伶俐。」
之前盛傳Hotcha成員不和,但Winkie今日就話冇咁嘅事。