【體壇性侵】疑似抽水被網民插爆 陶傑:點諗係你嘅事
陶傑呂麗瑤體壇性侵欄后
「欄后」呂麗瑤噚日凌晨喺facebook公開經歷,稱十年前被中學課外活動嘅教練性侵犯,仲指公開呢件事,係想喚起公眾關注兒童性侵犯,鼓勵其他受害人發聲。而陶傑今日喺facebook都有講到呢件事:
【兄弟姊妹站出來】
見到荷李活女明星個個玩得咁型,崇洋的我,又豈能不追上西方先進國家潮流呢?
我在幼稚園低班時,曾經俾一個女教師摸過塊面,我現在回想,雖年代久遠,我也無辜一度淪為性侵犯性欺凌之低端人口之一。
那個Miss 叫做黃詠儀(好普通的港女名,如有雷同實屬巧合),佢當年未經我同意,運用職業霸權,觸碰兒童的我的身體。
黃詠儀婆婆你而家去咗邊?
感謝Facebook 新世代,只須單方面貼張Selfie,就可以令好多人變成「維恩斯坦」,或者Kevin Spacey。
荷李活處處色魔,香港體育界又咁淫賤,咁學界有冇教獸?宗教界有冇牧屍?
香港影視娛樂圏,唔通又只係一個人人追求戲劇藝術進修的清淨天堂?
(PS: 2015年3月,特首千金梁齊昕在Facebook 貼圖透露曾被老母家暴,有人報警,同年3月21日,警務處處長曾偉雄話:「不能夠網上講乜,警方就去查。」)
不過呢段文一出之後,陶傑被網民勁鬧,但都有網民就話其實成篇文嘅重點係陶傑嘅「PS」,講警務處處長曾偉雄嘅一句說話。
《蘋果》問過陶傑,佢就話:「《紅樓夢》作者曹雪芹,300年嚟好多人都考究佢想講乜嘢,莎士比亞作品,好似《王子復仇記》、《暴風雨》都係唔同角度睇到唔同嘅嘢,所以我向來講3樣嘢;常識、邏輯同法治,係咁多。有人睇覺得係點、點諗係你嘅事,冇問題。係中世紀有人見到3個女人圍住橡樹跳舞,都覺得佢哋係女巫。呢個世界有70億人,覺得點點點。講緊係言論自由,我冇攻擊任何人,攻擊緊自己。今晚開咪唔講,fb講晒。中國人覺得係佢哋嘅事,佢哋3千年嚟都覺得好多嘢,如果你同佢糾纏,唔使做人。70年代香港人返大陸,都覺得係特務,你咪慢慢覺得囉,who cares。」
陶傑又補充:「佢『覺得』係佢自由,我尊重佢『得』,我絕對冇comment,你自己睇啦。有人『覺得』重點喺最後,有人『覺得』第二段,有人『覺得』重點係張相,呢個世界立場自由、言論自由,『覺得』亦係自由,唔好將呢啲『覺得』去侵犯人嘅清白、人權就得喇。呢個係重點,我覺得。」
陶傑講完之後被網民插爆(陶傑facebook圖片)