報業公會舉行「香港最佳新聞獎」頒獎禮，席上碰到作家Ａ，笑到四萬咁口。老總Ｓ話作家Ａ新婚不久，目前仍然係度蜜月心情，故此笑容燦爛。左丁山就話：「既然心情咁好，點解要在專欄內批評蔡議員啲英文病句呀？」作家Ａ話：「要交稿喎，報館編輯指定要我評論蔡議員嘅英文《香港家書》，有乜法子？」
作家Ａ讀英文系出身，做過英文大報政治編輯，寫過幾年英文專欄，月旦蔡議員嘅英文，梗係有資格。事實上，佢現在日日寫一個中英專欄畀學生睇，搵題材都唔係咁易啫，有篇蔡議員家書送上門，正好手到拿來，半小時就寫好篇稿。

作家Ａ話：「如果有多幾篇蔡議員英文家書之類，我就唔憂冇題材咯！」搵題材，眼前即刻有一件，左丁山叫作家Ａ搵番《南華早報》四月六日全版富邦銀行嘅廣告。港基銀行改名為富邦銀行，四月六日在全港中文報紙賣全版廣告，英文報紙亦有。照道理呢啲「大廣告」應有4A廣告公司代理，有「寫手」（copywriter）效勞，但唔知點解，富邦銀行啲英文廣告嘅英文，雖則短短幾行，已足夠題材畀作家Ａ品評指正一番。左丁山嘅英文好水啫，唔敢亂噏，請作家Ａ操刀可也。
老總Ｓ問作家Ａ：「平情而論，蔡議員啲英文掂唔掂？」作家Ａ話：「其實水準唔錯㗎，好過好多人。個執筆人如有時間推敲，一啲句子可以寫得更好。」外國啲政治人物都聘用專人寫演講辭、書信等等，香港立法會議員一般交畀議員助理起草，自己審閱，如果兩人嘅語文程度都唔多好，惟有請外援，不過「筆直有限」，未必請到高手。作家Ａ話目前行情係八至十蚊一隻英文字，蔡議員封家書大概有一千三百字，請人寫，稿費要一萬至萬三左右，寫多幾篇嘅話，議員津貼邊處夠用。