當年今日

  選舉黑幕疑雲飛哥調停有責 - 李八方

蘋果日報 2004/05/19 00:00


茶杯裏的飛哥,聯同商台才子梁文道及鄭大班指定精神代表林旭華,喺節目接獲好多市民投訴,話受到大陸方面親友施壓,下令九月立法會選舉一定要投親中候選人,若然聽話就有賞,每張選票發放獎金三百元。

教市民出蠱惑
親中派即時炮轟,話民主派利用匿名電話,企圖「抹黑」親中候選人,並叫呢啲投訴人有膽就蒲頭現身,向中聯辦投訴咁講。
現身投訴?好似曾憲梓話頭,食咗老虎膽麼?蔣彥永醫生指證沙士疫症,都遭到圍攻迫害,廣州《南方都市報》記者指證大學生孫志剛被收容時監生打死,總編輯都遭到收監入獄。叫啲市民現身指證喺大陸受到邊個官恐嚇,或者遇着邊個單位派錢,點知自己會唔會喺香港俾人淋紅漆、掟狗屎,連馮檢基、司徒華咁有頭有面,都受到本地老左暴徒嘅暴力恐嚇,舉證祖國插手干預選舉,未死過呀?
選親中候選人,每票賞銀三百,雖然好吸引,但要確保磅咗水先,以免投咗票,大陸嗰邊唔認數(呢啲嘢喺大陸做生意嘅領教得最多)。另外,八方都重係覺得有啲漏洞。冇錯,呢頭收咗錢,嗰頭投票,雖然有用視像電話攝錄為證,但正如選舉事務處總秘書李榮,教唆咗市民點樣選票出蠱惑抗共,例如領多一張表格,打個假嘅「剔」落去蔡素玉個名,開手機攝錄交差,然後撕咗佢再填過一張,呢張就選李柱銘,三百元硬𡁻,嗰頭又可以呃埋中央人民政府,一生有幾何機會,做人有咁大滿足感?
須取價格共識
不過八方認為,問題唔係獎金唔夠(當然,人心肉做,若然國家肯加到每票三千,我哋香港人選曾鈺成同蔡素玉嘅意志,會更為堅定),而係邊啲先至係國家正式認可嘅親人候選人。
例如,收咗三百元,選唔選得田少呢?講到親中,田少勁反○七○八普選,親中親到唔親。之不過,23條又係俾田少出賣老董,發動七七事變親手打沉。喺國家眼中,田少值唔值三百,定係佢前期親中、中期反中、近期又轉為親中,市民選錯咗田少,返鄉吓憑手機攝錄圖像向國家收錢,國家唔認數,變咗隨時東莞方面好心,話田少算係一半親中,故此只肯畀百五,到咗順德,嗰邊嘅領導人裁定田少罪大惡極,投票嘅市民不但冇獎金攞,重要拉人追究,咁就會引起好大混亂。
因此,三百蚊獎一張選票,始終最好國家發布一張統一嘅名單,或者列明價格,例如投民建聯三百,范太親中立場未明,投范太二百,投周梁百五,投田少就當如投民主派論處,咁嘅指引就清晰好多。
商台大班喺做節目嘅咪後,亦做好多嘢跟進冤情,飛哥接咪咁耐,行動略嫌未夠,喺呢方面,或者佢可以利用港區人大代表身份,做完節目嗰朝就返廣東福建,就三百元一票嘅灰色地帶協調吓,喺華南地區取得一個價格共識,九月就會少好多打死狗講價嘅無謂爭拗嘞。



傳真︰2623-9278
電郵︰[email protected]